Skínandi tærar strendur og spennandi menning

Mælt er með flugi með Icelandair til Rómar og flugi áfram með Aeroitalia til Alghero flugvallar. Ekið með rútu til hótels í Alghero.

Við hefjum daginn á jóga og morgunverði og förum í göngu um Alghero þennan heillandi bæ, ekki síst vegna gamla hlutans innan fornra virkisveggja með varðturnum sem voru byggðir af Katalóníumönnum á 16. öld. Margir íbúar tala enn mállýsku frá þeim tíma og ýmissa áhrifa gætir í byggingum sem minna á Katalóníu. Hægt er að fara gönguleið um bæinn með ströndinni sem er afar falleg um sólsetursbil.

Við förum um göngugötur gamla bæjarins sem hefur líflegt andrúmsloft og röltum meðal verslana, kaffihúsa, bara og veitingastaða. Áhugaverð saga leynist í vel varðveittum gömlum byggingum eins og 16. aldar höllinni, Palazzo d’Albis og dómkirkjunni með sínum sérstaka blandaða byggingarstíl.

Sé vilji til að fleygja sér í sólbað þá má njóta þess á hvítri sandströnd Spiaggia del Lido di Alghero sem liggur frá höfn bæjarins og teygir sig fimm kílómetra til norðurs. Að auki má finna nokkrar fleiri litlar strendur við bæinn.

Við hefjum daginn á jóga og morgunverði. Í boði er að skoða Neptúnusar hellinn sem er á tanganum á móti Alghero. Tekinn er bátur frá höfninni í bænum og ferðin tekur um 45 mínútur. Hellirinn er einn af þekktari stöðum í þessum hluta Sardiníu og í fylgd leiðsögumanns er gengið á milli hvelfinga. Þetta einstaka sköpunarverk náttúru minnir oft á skúlptúra og dómkirkjuhvelfingar, gert af vatnsdropum sem fallið hafa í aldanna rás og mótað dropasteina úr kalksteini í ýmsum litum og lögun. Hvelfingar hellisins eru upplýstar að hluta sem skapar töfrandi sýningu.

Ferðin er valfrjáls og aðgangur í bát og helli ekki innifalinn í heildarverði ferðarinnar.

Morgunjóga og morgunverður. Að því loknu er dagurinn þinn hvort sem það er í göngu um bæinn, sólbaði á strönd, slökun við hótelið eða hverju sem hugurinn girnist.

Að loknu morgunjóga og morgunverði ökum við fagra strandleið til bæjarins Cabras þar sem við heimsækjum fornleifasafnið, staðsett við bakka víðáttumikils lóns. Hér gefst kostur á að gægjast inn í forsögulega tíma og að kynnast hinni fornu Tharros, borg sem stofnuð var af Fönikíumönnum og blómleg á tímum Púnverja og Rómverja. Nýjasti hluti safnsins var opnaður árið 2014, tileinkaður risunum í Monte Prama. Það eru hlutar af styttum sem fundust í jörðu nærri fjallinu Prama er bændur plægðu jörð. Sjá má þessar styttur samsettar, hæð þeirra er frá 2 til 2,5 metrum og má velta fyrir sér hvaða tilgangi þær þjónuðu en það er fornleifafræðingum enn ráðgáta.

Frá safninu höldum við til Is Arutas sem er einstaklega töfrandi sandströnd þakin fíngerðum og ávölum kvartskornum í hvítum, bleikum og grænum tónum í glitrandi víðáttu. Hér er veisla fyrir skilningarvitin – við sökkvum okkur niður í tæran sjó sem á að líta er smaragðsgrænn, grænblár eða ljósblár. Is Arutas er eiginlega ómissandi upplifun á ferð um Sardiníu og oft á lista yfir fegurstu strendur jarðar.

Eftir að hafa notið strandar höldum við til hins Helga brunns heilagrar Cristinu, Pozzo Sacro di Santa Cristina sem er eins konar hof byggt yfir brunn og undraverð byggingarlist. Það er byggt af ferningslaga steinum og fylgir fullkomlega lögmálum rúmfræði svo halda mætti að það væri byggt á nútíma.

Til að ganga að brunninum eru gengnar tröppur niður sem umluktar eru steinveggjum. Á haust- og vorjafndægum lýsir sólin algerlega upp botn brunnsins svo geislar sólar flæða niður líkt þeir snerti vatnið. Við þær aðstæður fylgja tveir skuggar hverjum þeim sem gengur síðustu tröppurnar; einum skugga er varpað út í vatnið, hinn sígur niður úr hvolfinu. Fyrirbærið vekur mikla undrun hjá þeim sem upplifa það.

Aðgangseyri greiðir hver fyrir sig í bæði söfnin.

Morgunjóga, morgunverður. Og dagurinn er þinn!

Að loknu morgunjóga og morgunverði rýnum við inn í sögu svæðisins og heimsækjum Necropolis Anghelu Ruju, grafhýsi sem uppgötvuðust fyrir tilviljun árið 1903. Við gröft grunns að húsi á vínbúgarðinum Sella & Mosca fundust minjar í jörðu og í kjölfar þess fóru fram fornleifauppgreftir á staðnum sem drógu fram í dagsljós einn stærsta forsögulega kirkjugarð Sardiníu. Grafirnar voru höggnar í mjúkan sandstein og tilheyra mismunandi menningarheimum frá síðasta tíma steinaldar fram á bronsöld.

Athyglisverð er virðing fyrir hinum látnu sem blandast virðingu fyrir náttúrunni sem jafnvel í dag lifir enn með íbúum eyjarinnar. Fyrir augu ber lágmyndir og útskurðarmyndir á veggjum sem sýna dularfull tákn hinna fornu trúarbragða nýsteinaldar.

Arkitektúr þessara eilífu vistarvera er oft skreyttur atriðum sem voru innblásin af heimilum lifandi fólks eins og tröppum og súlum. Grafirnar líta sumar út eins og lítil hús sem höggvin voru í móðurkvið móður jarðar. Hinum dánu fylgdu hlutir sem voru þeim gagnlegir og kærir í lífinu, skraut úr steinum og skeljum, vasar og stein- eða bronsáhöld og kvenkyns skurðgoð.

Við fáum okkur hádegismat á vínbúgarðinum Sella & Mosca, sem framleiðir mikið úrval af vínum, en býður einnig vínsmökkun og er almennt talinn virtasti vínframleiðandi Sardiníu. Rekstur hófst árið 1899 og búgarðinum tilheyra 550 hektarar af vínekrum. Hundrað ára saga í víngerð hefur sópað til sín óteljandi innlendum og alþjóðlegum verðlaunum.

Síðdegis heimsækjum við fornleifasvæðið Nuraghe Palmavera sem hefur verið aldursgreint aftur til 15.-14. aldar fyrir Krist. Það samanstendur af nokkrum turnum sem eru tengdir saman, en Nuraghe Palmavera og nærliggjandi þorp voru byggð í ýmsum áföngum á bronsöld og járnöld.

Aðgangseyri greiðir hver fyrir sig í söfn og hádegisverð á vínbúgarði.

Við kveðjum Alghero og höldum til flugvallarins.